Süleýman Rawendi

ABU BEKIR MUHAMMET ibn Aly ibn Süleýman ar-Rawendi - Eýran taryhçysy. Ol Ispihanda doglupdyr. 1174-1184 ýyllarda Hemedanda musulman hukuk ylymlaryny we kalligrafiýany öwrenipdir. 1181-1189 ýyllarda seljuk soltany Togrul II (1175-1194) köşgünde kalligrafiýaçy bolup işläpdir. 1190 ýylynda Hemedan emiri Fahretdin Alawynyň ogullarynyň terbiýeçisi bolupdyr. 1206 ýylynda Konýa göçüp gidipdir. Ol şol ýerde-de ölüpdir. Awtor 1202-1205 ýyllarda Konýa soltany Giýasetdin Keýhosrawa (1192-1200, 1204-1210) bagyşlap "Ýürekleriň dynç almagy we şatlyk gudraty" ("Rahat as-sudur we aýat as-surur") diýen kitap ýazypdyr. Onda Seljuk döwletiniň 11 asyryň başyndan 1199 ýylyna çenli bolan taryhy beýan edilýär. Ol eser Seljuk döwletiniň 1160-1199 ýyllardaky taryhy boýunça esasy çeşme bolup hyzmat edýär.